კახაბერ აბელის ძე სურგულაძე
აჭარის ავტონომიური რესპუბლიკის უმაღლესი საბჭოს განათლების, მეცნიერების, კულტურისა და სპორტის საკითხთა კომიტეტის წევრი
დაიბადა 1964 წლის 6 ივნისს ქ. ბათუმში. 1981 წელს დაამთავრა ქ. ბათუმის №4 საშუალო სკოლა.
1981-1986 წლებში სწავლობდა ქ. ბათუმის შოთა რუსთაველის სახელობის სახელმწიფო პედაგოგიურ ინსტიტუტის ისტორია-ფილოლოგიის ფაკულტეტზე, ქართული ენა- ლიტერატურისა და ისტორიის სპეციალობით. კვალიფიკაცია - ქართული ენა-ლიტერატურისა და ისტორიის მასწავლებელი.
1986-1989 წლებში სწავლა განაგრძო ქ. თბილისის ივანე ჯავახიშვილის სახელობის სახელმწიფო უნივერსიტეტის ასპირანტურაში ძველი მსოფლიო ისტორიის განხრით. 1989 წელს დაიცვა საკანდიდატო დისერტაცია თემაზე ,,ციცერონი და რომის აზიური პოლიტიკა“ .
1990 წლიდან ეწევა სამეცნიერო საქმიანობას. ქ. ბათუმის სახელმწიფო პედაგოგიურ ინსტიტუტში მოსამზადებელ ფაკულტეტზე იყო საქართველოს ისტორიის პედაგოგი, ხოლო აღნიშნული სასწავლებლის უნივერსიტეტად გარდაქმნის შემდეგ მსოფლიო და საქართველოს ისტორიის კათედრაზე ეკავა ჯერ დოცენტის, შემდეგ კი პროფესორის თანამდებობა.
2002 წლის 20 ნოემბერს თბილისის ივანე ჯავახიშვილის სახელობის სახელმწიფო უნივერსიტეტის მსოფლიო ისტორიის სადისერტაციო საბჭოს სხდომაზე დაიცვა სადოქტორო დისერტაცია თემაზე ,,ციცერონი და სამოქალაქო ომი რომში“ . მინიჭებული აქვს ისტორიის მეცნიერებათა დოქტორის სამეცნიერო ხარისხი.
2003-2005 წლებში კითხულობდა ლექციათა კურსს სპუ-ში საქართველოს ისტორიის კათედრაზე და თსუ-ში მსოფლიო ისტორიის კათედრაზე.
ამჟამად ბსუ-ში კითხულობს ლექციათა კურსს: ანტიკურ ისტორიას, ანტიკური ისტორიის ისტორიოგრაფიას, საქართველოს ისტორიას და საერთაშორისო ტერორიზმის ისტორია.
2004 წლის 20 ივლისიდან არჩეულია აჭარის ავტონომიური რესპუბლიკის უმაღლესი საბჭოს დეპუტატად.
2005 წლიდან არის ბათუმის შოთა რუსთაველის სახელობის სახელმწიფო უნივერსიტეტში საქართველოსა და მსოფლიო ისტორიის დეპარტამენტის ხელმძღვანელი.
2008 წლის 13 ივნისს არჩეული იქნა აჭარის ავტონომიური რესპუბლიკის უმაღლესი საბჭოს განათლების, მეცნიერების, კულტურისა და სპორტის საკითხთა კომიტეტის თავმჯდომარის მოადგილედ.
იცის ფრანგული, თურქული, რუსული ენები.
ჰყავს ორი შვილი.